• Հայ
  • Рус
  • Eng
Ապագա բժիշկները կամավոր մեկնել են «առաջնագիծ»՝  հանուն կյանքերի փրկության
Ապագա բժիշկները կամավոր մեկնել են «առաջնագիծ»՝ հանուն կյանքերի փրկության
14.07.2020

Երևանի Մխիթար Հերացու անվան պետական բժշկական համալսարանի ուսանողներն առաջին իսկ օրերից կամավոր ներգրավվել  են Քովիդ-19-ի դեմ պայքարում:  ԵՊԲՀ կլինիկական աշխատանքների կազմակերպման վարչության հիգիենիկ և համաճարակային բաժնի պետ Կարինե  Պողոսյանը  հիացմունքով  է ներկայացնում «առաջին գծում»  զինվորագրված ապագա բժիշկների անտրտունջ ու անշահախնդիր աշխատանքը: 

«Մենք ունենք  «Հերացի 1», «Մուրացան» հիվանդանոցային համալիրները, ատամնաբուժական  պոլիկլինիկաներ, հանրակացարան, և երբ  նախապատրաստում  էինք  հակահամաճարակային մեր գործողությունները,  ուսումնական գործընթացը դեռևս դադարեցված չէր:  Արդեն ակնհայտ էր, որ պետք է միավորել  ջանքերը, համախմբվել՝ առողջապահական լրջագույն մարտահրավերի հաղթահարման գործում: Բուժանձնակազմը պետք է իրականացներ բուժական գործը, ապագա բժիշկները եկան՝ օգնելու ջերմաչափման, թերթիկների լրացման և այլ հարցերում, որոնք անչափ կարևոր են մեր՝ համաճարակաբաններիս համար: Ի դեպ, այս հարցում սիրով պատրաստակամություն հայտնեցին աջակցելու ԵՊԲՀ ուսխորհուրդն ու ԵՊԲՀ քոլեջը, իրենց օգնությունն առաջարկեցին»,-նշում է Կարինե Պողոսյանը: Ապագա բժիշկներն, ըստ համաճարակաբանի, հսկայական աշխատանք են իրականացրել և շարունակում են իրականացնել համավարակի տարածումը բժշկական մայր բուհի ստորաբաժանումներում կանխելու, զսպելու համար:

«Հնարավոր չէր շենքերի մուտքերի մոտ իրականացնել այցելուների, պացիենտների հսկողությունը, որոշվեց նաև՝ խիստ սահմանափակել  այցելուների մուտքը: Այստեղ է հատկապես, որ օգնության եկան բժշկական համալսարանի կամավոր ուսանողները: Մարդիկ, երբ իրենց հիվանդի համար սնունդ, հիգիենիկ պարագաներ են բերում, հաշվի առնելով համավարակի հետևանքով լարված վիճակը,  նրանց չի թույլատրվում դրանք անձամբ փոխանցել հիվանդին: Մեր կամավորներն արագ կազմակերպում են փոխանցումը,  դեղին թերթիկների վրա գրում են՝ բաժանմունքի անունը, որ պացինետի համար է նախատեսված, կապ են հաստատում մայրապետի հետ, մայրապետն իջնում, վերցնում է և հանձնում»:

ԵՊԲՀ կլինիկական աշխատանքների կազմակերպման վարչության հիգիենիկ և համաճարակային բաժնի պետ Կարինե  Պողոսյանի խոսքով, դժվարին գործին կամավոր զինվորագրված ուսանողներն իրենց բաժնում անցել են հատուկ դասընթաց՝ ինչպես պետք է պաշտպանվել կորոնավիրուսի վարակից, ինչպես կրել անհատական պաշտպանիչ միջոցները՝ դիմակ, ակնոց, ինչպես հագնել արտահագուստը: «Չափազանց մեծ պատասխանատվություն է  ապահովել ոչ միայն բուժանձնակազմի, այլ նաև ուսանողների անվտանգությունը: Աշխատանքը, որ իրենք են կատարում, անտրտունջ, չդժգոհելով, ոչինչ չպահանջելով, իսկապես արժանի է գնահատանքի:  Շատ ուրախ եմ, որ մեր ուսանողները կրկին կամավոր սկզբունքով օգնում են Քովիդ 19-ի դեմ առաջնագծում պայքարող բժիշկներին, ժամերով մնում են կորոնավիրուսային հիվանդության բուժմամբ զբաղվող բուժհաստատություններում: Այսօր ցանկացած նման օգնություն ավելորդ չէ: Եվ բուժական մասով են  կարողանում օգնել, կատարում են սանիտարի, մայրապետի, բուժքրոջ աշխատանք ու նաև, ինչպես արդեն նշեցի, ադմինիստրատիվ աշխատանք, ինչը ևս շատ կարևոր է լարված այս օրերին»:

Բժշկուհին խոստովանում է՝ արդեն չորրորդ ամիսն է՝ մի քանի տասնյակ ուսանողներ կամավոր գտնվում են համավարակի դեմ պայքարի առաջնագծում՝ չզլանալով կատարել իրենց առաջարկած ցանկացած աշխատանք՝ իրենց ներդրումն ունենալով կյանքերի փրկության գործին: