• Հայ
  • Рус
  • Eng
Գերմանական ակադեմիական փոխանակման ծառայության կողմից անցկացվեց կրթաթոշակային ծրագրի տեղեկատվական օր
Գերմանական ակադեմիական փոխանակման ծառայության կողմից անցկացվեց կրթաթոշակային ծրագրի տեղեկատվական օր
09.09.2019

Գերմանական ակադեմիական փոխանակման ծառայությունը (DAAD) ԵՊԲՀ-ում անցկացրեց կրթաթոշակային ծրագրի տեղեկատվական օր: DAAD Հայաստանյան գրասենյակի ուսումնական և կրթաթոշակային ծրագրերի գլխավոր խորհրդատու Մերի Նավասարդյանը ԵՊԲՀ աշխատակիցներին, ուսանողներին և կլինիկական օրդինատորներին ներկայացրեց դրամաշնորային ծրագրին մասնակցելու կարգը։ Նա նշեց, որ ծրագրին կարող են դիմել այն օրդինատորները, որոնք տիրապետում են գերմաներենին՝ հավելելով, որ դրամաշնորհը կարող է տրվել երկաժամկետ և կարճաժամկետ։

Հանդիպմանը ներկա ԵՊԲՀ և DAAD շրջանավարտ, նյարդաբան Սարգիս Աբրահամյանը, կիսվելով ծրագրի մասնակցության իր փորձառությամբ՝ նշեց, որ Գերմանիա մեկնելու համար կան մի քանի կարևոր պատճառներ: Նա մանրամասնորեն ներկայացրեց այն բոլոր հնարավորությունները, որոնք ընձեռում է դրամաշնորհային ծրագիրը՝ նշելով, որ Գերմանիայում բուժումը հասել է մի մակարդակի, որտեղ վիրահատությունն անցկացվում է ռոբոտներով:

«Ծրագրին դիմողներից յուրաքանչյուրն ունի Գերմանիա մեկնելու իր սեփական մոտիվացիան: Բայց պետք է առանձնացնեմ շատ կարևոր հանգամանք. ծրագիրը լայն հնարավորություն է տալիս ոչ միայն հետազոտել հազվադեպ հանդիպող հիվանդություննների ժամանակ ճիշտ ախտորոշումների կազմակերպումը, այլև զբաղվել գիտությամբ: Մինչև իմ Գերմանիա մեկնելը ես ցանկանում էի դառնալ լավ բժիշկ, իսկ այժմ ցանկանում եմ դառնալ լավ գիտնական, քանի որ բժշկությունը և գիտությունը իրարից անբաժանելի են»,-ընդգծեց Սարգիս Աբրահամյանը:

Նշենք, որ հանդիպմանը ներկա էին DAAD Հայաստանյան գրասենյակի ներկայացուցիչներ, շրջանավարտներ, որոնք ևս ակտիվորեն մասնակցեցին քննարկմանը։