• Հայ
  • Рус
  • Eng
«Հերացի» ավագ դպրոցի աշակերտները միացել են Մայրենի լեզվի միջազգային օրվան նվիրված ՅՈՒՆԵՍԿՕ-ի նախաձեռնությանը
«Հերացի» ավագ դպրոցի աշակերտները միացել են Մայրենի լեզվի միջազգային օրվան նվիրված ՅՈՒՆԵՍԿՕ-ի նախաձեռնությանը
21.02.2019

«Հերացի» ավագ դպրոցի աշակերտներ Ադրիանան և Ռոբերտը փետրվարի 21-ին մասնակցել են Կորեայի ՅՈՒՆԵՍԿՕ-ի Ազգային Հանձնաժողովի կողմից կազմակերպված Մայրենի լեզվի միջազգային օրվան նվիրված նախաձեռնությանը: Աշակերտները հայերենով ձայնագրել են հատվածներ ֆրանսիացի գրող Անտուան դը Սենտ-Էքզյուպերիի «Փոքրիկ իշխանը» ստեղծագործությունից, որը տարբեր օտար լեզուներով ամենաշատ թարգմանված գիրքն է, Աստվածաշնչից հետո:  

Նախաձեռնությանը, մեր հայ աշակերտների հետ մեկտեղ, մասնակցել են բազմաթիվ երեխաներ՝ իրենց մայրենի լեզվով ընթերցելով հատվածներ այս հանճարեղ ստեղծագործությունից:

«Հերացի» ավագ դպրոցում փետրվարի 21-ն առանձնացավ մայրենիին նվիրված միջոցառումներով: Օրն սկսվեց մայրենիի խորհուրդն իր մեջ կրող երգ-երաժշտությամբ, որն ապահովեց ոսկեղենիկ հայերենի քնարական հնչեղությունն ու հմայքը: 

Աշակերտների անմիջական մասնակցությամբ ու մտահղացումներով կազմակերպվեցին տարաբնույթ ինտերակտիվ միջոցառումներով՝ «Ե′կ խոսենք, եղբա′յր իմ, հայերեն», «Ոչ թե…, այլ», «Բառքամոցի», «Շուտասելուկների աշխարհում», «Գտիր հոմանիշը» խորագրերով: Միջոցառումների ընթացքում կարևորվեցին ճիշտ և բազմերամգ խոսքը, լեզվի անաղարտության պահպանման անհրաժեշտությունը:

Կազմակերպվեց նաև «Լեզվի ուժը գրքերի աշխարհում» դաս-միջոցառում, որի ընթացքում աշակերտները, կարևորելով գրքերի լեզուն և խոսքը, մեջբերեցին իրենց հոգեհարազատ գրքերից հատվածներ՝ դրսևորելով սեփական մոտեցումներն ու վերաբերմունքը լեզվի ոճի և գեղեցկության նկատմամբ:

Օրն ամփոփվեց «Հայոց լեզուն հազարագանձ» բաց դասով, որտեղ արժևորվեց մայրենիի միջազային տոնի նշանակությունը՝ յուրաքանչյուր ազգի գոյության և ինքնության պահպանման գործում: