Պատասխանում է ԵՊԲՀ-ի ուսումնական աշխատանքների գծով պրոռեկտոր, պրոֆեսոր Սամվել Ավետիսյանը
ՀԱՐՑ - Մեր ամբիոններում կան լավ և վատ դասախոսներ։ Լավերը ջանում են մի բան սովորեցնել, իսկ վատերը յոլա են տանում մինչև դասաժամն ավարտվի։ Մեր խմբի բախտն այդ առումով ինչ-որ չի բերում։ Պրոռեկտոր պրն Ավետիսյանը հայտարարել էր, որ դասախոսների մասնագիտական որակը վերահսկելու համար հանձնաժողով է ստեղծվելու։ Ե՞րբ կիրականացվի։
ՊԱՏԱՍԽԱՆ - Ինչպես ասվել է` դասախոսների մասնագիտական որակը վերահսկվելու է։ Մոտ օրերս համալսարանի ռեկտորի հրամանով կստեղծվեն նշված հանձնաժողովները։
Պատասխանում է ԵՊԲՀ-ի ուսումնական աշխատանքների գծով պրոռեկտոր, պրոֆեսոր Սամվել ԱվետիսյանըՀԱՐՑ - Առաջարկում եմ Անատոմիայի ամբիոնը կցել Հայոց լեզվի ամբիոնին, քանի որ մեզ տրվող թեստերը կարծես հիմնված են բառախաղի վրա։
ՊԱՏԱՍԽԱՆ - Նորմալ անատոմիայի ամբիոնի քննական թեստերը ընտրանքային կարգով նայվել են մեր կողմից։ Բառախաղերի չենք հանդիպել։ Եթե ուսանողներին հայտնի են կոնկրետ օրինակներ, ապա պատրաստ ենք դրանց անդրադառնալու։
Պատասխանում է ԵՊԲՀ-ի ուսումնական աշխատանքների գծով պրոռեկտոր, պրոֆեսոր Սամվել Ավետիսյանը
ՀԱՐՑ - Մագիստրատուրայի առաջին կուրսի ուսանող եմ, բայց կարծես դեռ բակալավրիատի 4-րդ կուրսում եմ սովորում։ Այսօր շատերիս մտահոգում են անկատար ծրագրերը։
ՊԱՏԱՍԽԱՆ- Համալսարանի ռեկտորի հանձնարարությամբ և նրա անմիջական հսկողությամբ ծրագրերի հիմնարար, համակարգային փոփոխություններ են կատարվում բակալավրիատ-մագիստրատուրա-հետդիպլոմային կրթության մակարդակներում։ Դրանք ուսումնական գործընթացում կներդրվեն եկող ուսումական տարվանից։
Պատասխանում է ԵՊԲՀ-ի ուսումնական աշխատանքների գծով պրոռեկտոր, պրոֆեսոր Սամվել Ավետիսյանը
ՀԱՐՑ - Ես տհաճությամբ եմ գնում ֆիզիոլոգիայի ամբիոն, որովհետև այնտեղ կենդանիների վրա փորձեր են անում։ Միթե հնարավոր չէ դասը մատուցել առանց կենդանիներին զոհելու։
ՊԱՏԱՍԽԱՆ- Ուրախությամբ պիտի տեղեկացնեմ, որ այսուհետև կենդանիներին զոհելու անհրաժեշտություն չի լինի։ 1-1,5 տարվա աշխատանքի արդյունքում դեռևս միայն ստոմատոլոգիական ֆակուլտետի ուսանողների համար ֆիզիոլոգիայի ամբիոնը մոտ 4 հազար եվրոյի դրամաշնորհ է ստացել, որի շնորհիվ ձեռք կբերվեն անհրաժեշտ տեխնիկա և աշխարհի առաջատար գիտահետազոտական լաբորատորիաներում նկարահանված թեմատիկ ֆիլմեր։ Մոտ ապագայում այդ հնարավորությունից կօգտվեն փորձարարական մյուս ամբիոնները և այլ բուհերի ուսանողները։
Պատասխանում է ԵՊԲՀ գիտ. աշխատանքների գծով պրոռեկտոր,պրոֆեսոր Միքայել Նարիմանյանը
ՀԱՐՑ- Կան արդյո՞ք փոփոխություններ Երևանի Մ. Հերացու անվան պետական բժշկական համալսարանի ասպիրանտուրայի ընդունելության կարգում:
Ավարտական կուրսի ուսանողներ
Ասպիրանտուրայում ուսուցումն իրականացվում է առկա և հեռակա կարգով` անվճար և վճարովի հիմունքներով: Առկա ուսուցման տևողությունը 3, հեռական 4 տարի է:
Օտար երկրների քաղաքացիները և ՀՀ քաղաքացիություն չունեցող անձինք բուհի ասպիրանտուրա են ընդունվում վճարովի հիմունքներով` միջպետական և միջգերատեսչական պայմանագրերի կամ համաձայնագրերի հիման վրա, ինչպես նաև սեփական նախաձեռնությամբ: Նրանց համար պարտադիր պայման է ՀՀ-ում բժշկական ապահովագրությունը:
Ասպիրանտուրա ընդունվողները քննություն են հանձնում մասնագիտական առարկայից: