Yerevan State Medical University

Հիմնադրվել է 1930թ.-ին (1926թ.):

Ամբիոնի վարիչ` Կարեն Ռշտունի Բաբայան, բժշկական գիտությունների դոկտոր, պրոֆեսոր, ՀՀ ԱՆ գլխավոր մաշկավեներաբան

Պատմություն

Ամբիոնը հիմնադրվել է 1926թ.-ին Երևանի պետական համալսարանի բժշկական ֆակուլտետում և անվանվել է նախ Մաշկային և վեներական հիվանդությունների, ապա` Մաշկավեներաբանության, այնուհետև` Մաշկաբանության, սեռավարակաբանության և կոսմետոլոգիայի ամբիոն,իսկ 2008թ.-ից՝ Մաշկաբանության և սեռավարակաբանության ամբիոն:

ԵՊԲՀ-ի հիմնադրման օրվանից՝ 1930թ.-ից, ամբիոնը գործում է համալսարանի կազմում:

Ամբիոնի առաջին վարիչը եղել է դոցենտ Գերասիմ Դանիելի Տեր-Գրիգորյանը, ով ղեկավարել է 1926-1965թթ.-ին: Հետագայում ամբիոնի վարիչներ են եղել պրոֆեսորներ Գևորգ Քերոբի Անդրեասյանը (1965-1969թթ.) և Էդուարդ Երվանդի Դանիելյանը (1969-1993թթ.):

Մինչև 1998թ.-ը եղել է մասնագիտական միակ ամբիոնը և իրականացրել է ոչ միայն ուսումնական, կլինիկական, գիտահետազոտական աշխատանքներ, մասնակցել բժշկական կադրերի պատրաստմանը, այլև գործնական աջակցություն ցուցաբերել առողջապահության ոլորտին: Ամբիոնի աշխատակիցները, լինելով տվյալ բնագավառի առաջատար մասնագետներ, ապահովել են կապը հանրապետության մասնագիտական այլ կառույցների հետ, ինչպես նաև գիտահետազոտական համալիր աշխատանքներ իրականացրել արտերկրյա գիտահետազոտական ինստիտուտների հետ:

1993թ.-ից ամբիոնը ղեկավարում է ՀՀ ԱՆ գլխավոր մաշկավեներաբան, բժշկական գիտությունների դոկտոր, պրոֆեսոր Կարեն Ռշտունի Բաբայանը:

Վերջին 5 տարիների ընթացքում ամբիոնում կատարվել են ծավալուն աշխատանքներ ուսումնամեթոդական բնագավառում, ստեղծվել և գործնականում ներդրվել են տարբեր հիվանդությունների վերաբերյալ դիդակտիկ նյութեր` գունավոր սլայդներ և նկարներ, ատլասներ, տեսաժապավեններ: Ուսուցման և քննական գործընթացում կիրառվել են ժամանակակից թեստեր, համակարգչային տեխնիկա:

Միջազգային սերտ կապեր են հաստատվել բազմաթիվ երկրների հետ: Ամբիոնի աշխատակիցներն ակտիվ մասնակցություն են ունեցել միջազգային տարբեր համաժողովների աշխատանքներին, մի շարք ծրագրերի իրականացման ընթացքում կարճաժամկետ վերապատրաստումների նպատակով մեկնել են արտերկիր:

Ամբիոնի կլինիկական բազան Մաշկաբանության և սեռավարակաբանության բժշկագիտական կենտրոնն է, որը ևս ղեկավարում է պրոֆեսոր Կարեն Ռշտունի Բաբայանը:

Ուսուցում

Ուսուցումն իրականացվում է ընդհանուր բժշկության, ռազմաբժշկական և ստոմատոլոգիական ֆակուլտետների 4-րդ կուրսի ուսանողների համար` ցիկլային 10-օրյա պարապմունքերի տեսքով (60 ժամ):

Առարկան դասավանդվում է նաև անգլերեն և ռուսերեն լեզուներով:

Ծրագրով նախատեսված թեմատիկ նյութն ուսանողներին մատուցվում է դասախոսությունների և գործնական պարապմունքների տեսքով: Գործնական պարապմունքներն անց են կացվում հիվանդասենյակներում, լաբորատորիաներում: Լայնորեն կիրառվում են մաշկային տարբեր հիվանդությունների և սեռավարակների լուսանկարներ, թեմատիկ սլայդեր, համակարգչային տարբեր ծրագրեր, տեսաֆիլմեր:

Գիտահետազոտական աշխատանքներ

Վերջին 10 տարիների ընթացքում ամբիոնի գիտահետազոտական աշխատանքները նվիրված են եղել սեռավարակների համաճարակաբանությանը, կլինիկական առանձնահատկություններին և բուժկանխարգելիչ աշխատանքների իրականացման խնդիրներին: Ամբիոնի մասնագետների շնորհիվ Հայաստանում առաջին անգամ մշակվել և հրատարակվել է «Սեռավարակների վարման ազգային ուղեցույց» ձեռնարկը:

Ներկայումս ամբիոնի գիտական թեման է «Հայաստանում գոնորեայի հարուցիչի հակամանրէային զգայունությունը հակաբիոտիկների նկատմամբ»:

Համագործակցություն

Ամբիոնը գիտական սերտ կապերի մեջ է Սեռավարակների դեմ պայքարի եվրոպական միության, Թբիլիսիի մաշկավեներաբանների ասոցիացիայի, Հարավային Կովկասի երկրների մաշկավեներաբանների գիտական ասոցիացիայի, Վրաստանի մաշկաբանության և վեներոլոգիայի գիտահետազոտական ինստիտուտի, Մաշկաբանների հայ-գերմանական ասոցիացիայի հետ:

Միջազգային գիտաժողովներ

Վերջին տարիների ընթացքում ամբիոնը կազմակերպել է հետևյալ գիտաժողովները`

• Մաշկավեներաբանական հայ-գերմանական 1-ին, 2-րդ և 3-րդ գիտաժողովներ,
• Հարավային Կովկասի երկրների մաշկավեներաբանների գիտական ասոցիացիայի հետ համատեղ համաժողովներ:

Ամբիոնի աշխատակազմը